Ай Ти Зон компани МУИС-ийн Бизнесийн сургуультай дата ур чадвар эзэмшүүлэх чиглэлээр хамтран ажиллахаар боллоо

October 21. 2020

Дижитал шилжилтийг даган нийгмийн салбар бүрд өөрчлөлт, шинэчлэлт хийгдэж, тэр хэрээр цоо шинэ ур чадвар, шинэ мэргэжил үүсэн төрөх болсон. Үүний нэг бол яах аргагүй Дата ур чадвар юм. LinkedIn компаниас 2020 онд гаргасан “Ажлын байран дээрх хамгийн эрэлттэй байгаа ур чадварууд” тайланд дэлхий дахинаа хамгийн эрэлттэй 10 ур чадварыг (hard skill) жагсаахад  дөрвөн төрөлд нь дататай холбоотой буюу Аналитик үндэслэл гаргах, Хиймэл оюун ухаан, Бизнесийн дүн шинжилгээ хийх зэрэг дата ашиглах ур чадвар багтсан байдаг.

Энэхүү өндөр эрэлттэй, үнэ цэнэ нь улам бүр нэмэгдэх болсон ур чадварыг Монголынхоо багш, оюутнуудад эзэмшүүлэн, өрсөлдөх өндөр чадвартай боловсон хүчнийг бэлтгэхэд өөрсдийн хувь нэмрээ оруулах зорилгоор Ай Ти Зон компани нь Монгол улсын их сургуулийн Бизнесийн сургуультай хамтын ажиллагааны санамж бичигт гарын үсэг зурлаа.

МУИС-ийн Бизнесийн сургууль нь багш, оюутнуудынхаа мэдээллийн технологи ашиглах чадварыг дээшлүүлэх, ингэснээр багш, оюутны эрдэм шинжилгээ судалгаа болон сургалтын үйл ажиллагааг сайжруулах зорилт тавин ажиллаж байгаа бөгөөд энэхүү хамтын ажиллагаа нь тэдний сургалт, судалгааны үр дүнгээс гадна төгсөгчдийн ажлын байраар хангагдах боломжид сайнаар нөлөөлнө гэсэн хүлээлттэй байгаа юм.

Тус хамтын ажиллагааны хүрээнд Ай Ти Зон компани нь өгөгдөл бэлтгэл, анализ, дүрслэлийн программ хангамж болох Tableau BI-ийг нэг жил ашиглах эрхийг тус сургуулийн нийт 2747 оюутан, 86 гаруй багшид олгож, уг программ дээр мэргэжлийн түвшинд ажиллах практик ур чадвар олгох сургалтуудыг зохион байгуулах юм.

Tableau нь их хэмжээний өгөгдөл датаг бэлтгэх, цэвэрлэх, дүрслэх шийдлээрээ дэлхийд тэргүүлэгч технологи хөгжүүлэгч бөгөөд тус компанийн албан ёсны түншээр 2016 оноос хойш тасралтгүй ажиллаж буй Ай Ти Зон нь албан ёсоор сургагч эрх бүхий 15 дата экспертүүдээрээ дамжуулан Анхан болон Ахисан түвшний дата аналитикийн сургалтуудыг академик түвшинд тусгайлан бэлдсэн программ, хөтөлбөрийн дагуу тус сургуулийн 86 багш нарт урьдчилан хүргэх юм. Ийнхүү нийгмийн хариуцлагынхаа хүрээнд боловсролын салбарыг дэмжин ажиллаж ирсэн Ай Ти Зон компанийн хувьд энэ удаа 195 орчим сая төгрөгийн өртөг бүхий боловсролын хөрөнгө оруулалтыг тус сургуулийн эрдэмтэн багш төдийгүй, оюутан залуустаа хүргэхээр боллоо.

ITZONE - Ай Ти Зон компани МУИС-ийн Бизнесийн сургуультай дата ур чадвар эзэмшүүлэх чиглэлээр хамтран ажиллахаар боллоо